أجرى الرئيس عبد الفتاح السيسي زيارة إلى أكاديمية الشرطة، حيث كان في استقباله اللواء محمود توفيق، وزير الداخلية، واللواء هاني أبو المكارم مساعد وزير الداخلية رئيس أكاديمية الشرطة.

وصرح المتحدث الرسمي باسم رئاسة الجمهورية بأن الرئيس قدم التهاني بمناسبة حلول شهر رمضان المعظم وتناول وجبة الإفطار مع الطلبة الجدد وأسرهم.

وقال الرئيس عبد الفتاح السيسي، إنه يبلغ تحياته واحترامه وتقديره للأسر المتواجدة، معقبا: "أهنئ الطلاب والطالبات الموجودين، على الإنجازات اللي عملوها حتى الآن، وأتمنى لهم فترة الإعداد الأساسي، الخطوة دي تعدي بسلام، وتكملوا الدراسة، في جهد كبير صحيح لكن التطوير والإعداد الجيد اللي إحنا بننشده لأبنائنا وبناتنا، مش بس كده في الأكاديمية، كل مصر.. ولكن احنا بنتكلم النهاردة هنا في الأكاديمية على حلقات التطوير اللى تمت خلال السنوات اللي فاتت".

وأضاف خلال حفل إفطار أكاديمية الشرطة: "قلت الكلمة دي من كام يوم في الأكاديمية العسكرية، عن التطوير حالة متجددة متنتهيش، ومحدش يتصور أبدا إن أى مستوى أو مرحلة أو أي حالة وصلنا لها إن دي معناها النهاية وممكن ميبقاش في إضافة بعد كدة، وطول ما الدنيا موجودة، والدنيا بتتغير يوم عن يوم، ودي حكمة ربنا في خلقه، والدنيا اللي احنا فيها، الدنيا من ألف سنة غير الدنيا دلوقتي، غير الدنيا بعد شهر واتنين وتلاتة جايين".

وتابع: "سعداء بيكم، أهلا وسهلا، ومرة تانية بشكركم على أبنائكم وبناتكم اللي موجودين معانا، وزي ما أنتوا حافظتوا عليهم، اتأكدوا إن احنا كمان بنحافظ عليهم، مش هقول زيكم، ولكن بمعايير علمية وتربوية وإنسانية، بنتعامل فى تنشئة وإعداد وبناء الجيل أبنائكم وبناتكم".

واستكمل الرئيس السيسي: "كل سنة وأنتم طيبين، واطمنوا بفضل الله محدش يقدر يمس مصر، مش عشان احنا، لا، عشان ربنا موجود". 

وأوضح: "خليني أكلمكم عن اللي بنعمله مع أولادنا وبناتنا هنا في الأكاديمية، قلت الكلمة دي وبجددها معاكم وأسمعهالكم، إحنا فى مرحلة تطوير كبيرة جدا بس بهدوء شديد، مفيش فيها صخب ولا شوشرة ولا تعجل، وفي مؤسسات الدول أي تطوير بيتم فيها لازم يتم بدراسات ويتم بالتدريج، وأنتوا لما يكون عندكم ابن أو بنت وعمل مشكلة ولا حاجة، تطولوا بالكم عليه".