حل مطرب المهرجانات الشعبية عنبة ضيف على برنامج أسرار والذي تقدمه الإعلامية أميرة بدر على شاشة قناة النهار، والذي كشف من خلاله العديد من التصريحات الهامة والمؤثرة حول مطربي المهرجانات ونجاحاته الفنية، كما لام المطرب أحمد سعد خلال الحلقة أيضا.

تصريحات عنبة في برنامج أسرار 

ورصد موقع تحيا مصر تصريحات مطرب المهرجانات عنبة خلال حلوله ضيفا على برنامج أسرار، والتي تصدر بها التريند وحديث مواقع التواصل الاجتماعي المختلفة، وجاءت تلك التصريحات على النحو الآتي:

أنا ماشي على الطريق الصحيح ومش هدفي ألم فلوس من اليوتيوب.

حوادث الحبس الكتير لمطربين المهرجانات مش حلوة وعملت سمعة وحشة ليهم.

الناس زعلت مني عشان دافعت عن عصام صاصا بس هما ميعرفوش أنه ابن بلد وشقيان ومأذاش حد.

شايف نفسي عامل أغاني حلوة وهبقى حالة كبيرة في المزيكا وهبقى ممثل مطلوب جدا.

أحمد سعد فنان كبير وبحب صوته لكن أغنية سكوت نجحت جدا وراح غنا الأغنية في افتتاحية كأس العالم وقص حتتنا من الأغنية واستغربت ولا عاتبته ولكن عملت له الغاء متابعة.

أحمد سعد استفاد أكثر مننا من أغنية سكوت سكوت وبعشقه وهو راح للأجيال الجديدة.

نجاح الاغنية بيجيب لى حفلات وممكن اعمل حد متخصص للاعلانات والأفلام وهعمل كده وكزبرة عمل الخطوة دي وهو أخذ خطوة صح في طريقه.

حصل كذا حادثة في المجال ده وأنا مصنف تبع المهرجانات لكن الموسيقى اللى بعملها مهرجانات وحسيت أن في مشاكل والدنيا بتبوظ معانا.

تصريحات جريئة لعنبة 

وقال عنبة في تصريحاته الجزء الاول من البرنامج: معنديش صراعات في الوسط الفني وأنا بعمل مزيكا مختلفة وبنافس نفسي وبغير من نفسي وعايز ابقى أحسن من نفسي، ومحدش بيلعب في حتتي وأنا نمبر وان في المنطقة بتاعتي ومنطقتي بين الراب والمهرجانات اسمها تراب شعبي وأكتر اغنية عملتها وصلت لـ100 مليون مع أحمد سعد وعصام صاصا.

وعن أعداءه في الوسط الفني، أشار عنبة: في ناس بتكرهني زي حسن شاكوش وعمري ما حسيت أنى مضايق منه في عز نجاحه ومش بسلم عليه عشان كل ما أقابل حد يقولي شاكوش بيتكلم عليك وحش وهو مضايق من أغنية مش شايف فيكم حد وفاكر إني أقصده، وكمان مسلم الناس بتقولي بيكرهك.